മലയാളത്തിന് അഭിമാനിക്കാന് ഒരു ഹിന്ദി സാഹിത്യകാരന് ( മഹാത്മഗാന്ധി കോളേജില് ഹിന്ദി പ്രൊഫസറായിരുന്ന ചന്ദ്രശേഖരന് നായരെ 1995 ല് കേരള ഹൗസില് ഇന്റര്വ്യൂ ചെയ്ത് 1995 മാര്ച്ച് 16- ഏപ്രില് 1 ലക്കം ന്യൂഡല്ഹി ഇന്നില് പ്രസിദ്ധീകരിച്ചത്.2020 ല് രാഷ്ട്രം ഇദ്ദേഹത്തിന് പത്മശ്രീ നല്കി ആദരിച്ചു) തികഞ്ഞ ഗാന്ധിയന്,സാമൂഹ്യപ്രവര്ത്തകന്,പ്രിയങ്കരനായ അധ്യാപകന്,ചിത്രകാരന്.ഡോക്ടര് ചന്ദ്രശേഖരന് നായര്ക്ക് ഇണങ്ങുന്ന വിശേഷണങ്ങള് ധാരാളം. ഹിന്ദി പഠിക്കുക എന്നാല് ദേശസേവനമാണ് എന്ന ഗാന്ധിജിയുടെ ഉപദേശം ഉള്ക്കൊണ്ട് ,രാജ്യത്തിന് സ്വാതന്ത്ര്യം കിട്ടുന്നതിനും ഏറെ മുന്പ് ഹിന്ദി ഭാഷ പഠിക്കാന് തുടങ്ങിയ ഡോക്ടര് നായര് ഇപ്പോള് കേരള ഹിന്ദി സാഹിത്യ അക്കാദമി ചെയര്മാനാണ്. 45 ഗ്രന്ഥങ്ങളും നൂറ്റമ്പതില് അധികം ചിത്രങ്ങളും രചിച്ച ഇദ്ദേഹത്തിന്റെ പുസ്തകങ്ങളുടെയും ചിത്രങ്ങളുടെയും ഒരു പ്രദര്ശനം കേരളഹൗസ് കോണ്ഫറന്സ് ഹാളില് നടന്നു വരുന്നു. അദ്ദേഹവുമായുണ്ടായ കൂടിക്കാഴ്ചയില് നിന്ന്:
* ഹിന്ദി ഭാഷ പഠിക്കാനുണ്ടായ സാഹചര്യം ?
്# സ്വാതന്ത്ര്യം കിട്ടുംമുമ്പ് ഹിന്ദി ഭാഷ പഠിക്കുക എന്നാല് തിരുവിതാംകൂറില് ദേശദ്രോഹമായി കണക്കാക്കിയിരുന്നു. എന്നാല് ഹിന്ദി ഭാഷാ പഠനം ദേശസേവനമാണെന്ന ഗാന്ധിജിയുടെ ഉപദേശം എന്നെ ആകര്ഷിച്ചു. അന്ന് അതിനുളള സ്കൂളുകളൊന്നും ഉണ്ടായിരുന്നില്ല. കൊല്ലം ജില്ലയിലെ ശാസ്താംകോട്ടയാണ് എന്റെ ദേശം. കൊട്ടാരക്കര നിന്നുവന്ന കെ.രാഘവന് എന്ന ഹിന്ദി പ്രചാരകനാണ് എന്നെ ഹിന്ദി പഠിപ്പിച്ചത്.
* എതിര്പ്പുകള്?
# പലഭാഗത്തുനിന്നും എതിര്പ്പുകള് ഉണ്ടായി. അതെല്ലാം അതിജീവിച്ച് പഠനം മുന്നോട്ടുപോയി. ശാസ്താംകോട്ടയിലെ റെസിഡന്ഷ്യല് ഹൈസ്കൂളില് അധ്യാപകനായി. സ്കൂള് പ്രിന്സിപ്പല് ഡോ.സി.ടി.ഈപ്പന് 1947 ആഗസ്റ്റ് 15ന് സ്വാതന്ത്ര്യദിനാഘോഷം നടത്തുന്നതിനെ എതിര്ത്തു. എതിര്പ്പുകളെ അവഗണിച്ച് ആഘോഷം നടത്തി. അന്ന് ദേശീയഗാനം പാടിയ കുട്ടി പിന്നീട് പ്രസിദ്ധ നാടകകൃത്ത് സി.എന്.ശ്രീകണ്ഠന് നായരുടെ ഭാര്യയായി.
*സ്കൂള് അധികൃതരുടെ ഭാഗത്തുനിന്ന് നടപടി ?
# ഉണ്ടായേനെ, അതിന് കാത്തുനില്ക്കാതെ അടുത്ത ദിവസം തന്നെ രാജിവച്ചു.
* തുടര്ന്ന് --- ?
# ദക്ഷിണഭാരത ഹിന്ദി പ്രചാരസഭയുടെ രാഷ്ട്രഭാഷാ വിശാരദ് എഴുതിയെടുത്തു. അപ്പോള്തന്നെ പ്രാക്കുളം,പുനലൂര്,കടമ്പനാട് എന്നിവിടങ്ങളിലെ ഇംഗ്ലീഷ് സ്കൂളുകളില് നിന്നും നിയമന ഉത്തരവുകള് ലഭിച്ചു. പുനലൂര് സ്കൂളില് ജോലി സ്വീകരിച്ചു. അവിടെ ഇരുന്നുകൊണ്ട് മദ്രാസ് മെട്രിക്കുലേഷന് പാസായി.
* ആ കാലത്തെ പ്രത്യേക ഓര്മ്മകള് ?
# കുട്ടികള്ക്ക് വളരെ പ്രിയപ്പെട്ട അധ്യാപകനായിരുന്നു. ഇപ്പോഴത്തെ ഗതാഗത വകുപ്പു മന്ത്രി ആര്.ബാലകൃഷ്ണപിള്ള ശിഷ്യനായി അന്നവിടെ ഉണ്ടായിരുന്നു.
* പുനലൂരില് നിന്ന് പിന്നീട് --?
# തിരുവനന്തപുരത്ത് ശാസ്തമംഗലം എന്എസ്എസ് സ്കൂളിലേക്ക് മാറി. അവിടെ പഠിപ്പിക്കുന്ന കാലത്ത് തിരുവിതാംകൂര് സര്വ്വകലാശാലയില് നിന്നും ബിഎ പാസായി.
* എംജിയിലേക്കുള്ള മാറ്റം ?
# 1951 ഒക്ടോബറില് തിരുവനന്തപുരം മഹാത്മഗാന്ധി കോളേജില് ട്യൂട്ടറായി. തുടര്ന്ന് അലഹബാദിലെ ബനാറസ് ഹിന്ദു സര്വ്വകലാശാലയില് നിന്നും എംഎ എടുത്തു. 1967 വരെ എംജിയില് തുടര്ന്നു. പിന്നീട് ഒറ്റപ്പാലം എന്എസ്എസ് കോളേജില് ആറുകൊല്ലം പ്രൊഫസറായി സേവനമനുഷ്ടിച്ചു. അക്കാലത്ത് അവിടെ ഗാന്ധി വിജ്ഞാന് ഭവന് സ്ഥാപിച്ചു. സാമൂഹ്യതലത്തില് ഏറെ മെച്ചപ്പെട്ട പ്രവര്ത്തനങ്ങള് നടത്താന് അന്ന് സാധിച്ചു. ഗാന്ധി സെന്റിനറി കമ്മറ്റിയുടെ ഒറ്റപ്പാലം ഏരിയ ചെയര്മാനും പാലക്കാട് ജില്ല വൈസ് ചെയര്മാനുമായിരുന്നു. പിന്നീട് ഒരു വര്ഷം മട്ടന്നൂര് കോളേജില് തുടര്ന്നു.
* ഡോക്ടറേറ്റ്-- ?
# 1975 ല് എംജി കോളേജില് മടങ്ങിയെത്തി. ആ കാലത്ത് ബീഹാര് യൂണിവേഴ്സിറ്റിയില് പിഎച്ചഡിക്ക് ചേര്ന്നു. ഹിന്ദിയിലേയും മലയാളത്തിലേയും രണ്ട് പ്രതീകവാദികളായ കവികള്(സുമിത്രാനന്ദന് പന്തും ജി.ശങ്കരകുറുപ്പും) എന്നതായിരുന്നു വിഷയം. 1977 ല് ഡോക്ടറേറ്റ് കിട്ടി. തീസിസ് യൂജിസി പ്രസിദ്ധീകരിക്കുകയും ചെയ്തു. സുമിത്രാനന്ദന് പന്താണ് ഇതിന് ആമുഖമെഴുതിയത്. ഇത് ഹിന്ദി സാഹിത്യത്തിന് മാത്രമല്ല ഇന്ത്യന് സാഹിത്യത്തിന് തന്നെ ഒരു മുതല്ക്കൂട്ടാണെന്ന് അദ്ദേഹം ആമുഖത്തില് പറയുന്നു.
* ഈ വിഷയം തെരഞ്ഞെടുക്കാന് പ്രത്യേക കാരണം ?
# 1953 ല് മലയാളി വിശേഷാല് പതിപ്പില് ജീയും പന്തും എന്നൊരു ലേഖനം എഴുതിയിരുന്നു. അന്നേ മനസില് പതിഞ്ഞ വിഷയമായിരുന്നു ഇത്.
* ആദ്യം പ്രസിദ്ധീകരിച്ച പുസ്തകം ?
# 1961 ല് മലയാളത്തിലാണ് ആദ്യത്തെ പുസ്തകം. ' ചെരുപ്പുകുത്തിയുടെ മകള്' എന്ന ചെറുകഥാസമാഹാരം. 1962 ല് ' ദ്വിവേണി( രണ്ട് ധാരകള്) എന്ന ഹിന്ദി നാടകം. ഒരു മലയാളി എഴുതിയ ആദ്യത്തെ ഹിന്ദി നാടകമാണിത്. നിരവധി ഭാഷകളിലേക്ക് പിന്നീടിത് തര്ജ്ജമ ചെയ്യപ്പെട്ടു. ഗുജറാത്തിയില് നാല് വിവര്ത്തനങ്ങളുണ്ടായി.
* ഇതിന് പുറമെ ?
# 1962 ല് തന്നെ ' കുരുക്ഷേത്ര് ജാഗ്താ ഹെ'( കുരുക്ഷേത്രം ഉണരുന്നു), എന്ന നാടക സമാഹാരം. 1965 ല് ' ഹിമാലയ് ഗര്ജ് രഹാ ഹെ' ( ഹിമാലയം ഗര്ജ്ജിക്കുന്നു) എന്ന ഖണ്ഡകാവ്യം , തുടര്ന്ന് ജീവചരിത്രം, ചെറുകഥാ സമാഹാരം,നാടകം, ഖണ്ഡകാവ്യം എന്നീ വിവിധ സാഹിത്യ ശാഖകളിലായി 45 ഗ്രന്ഥങ്ങള് രചിച്ചു.
* അംഗീകാരങ്ങള് ?
# സുമിത്രനന്ദന് പന്ത് ഉള്പ്പെടെ 14 സാഹിത്യകാരന്മാര് ചേര്ന്ന് എന്റെ കൃതികളെ സംബ്ബന്ധിച്ച് തയ്യാറാക്കിയ പുസ്തകം എല്.കെ.അദ്വാനി മന്ത്രിയായിരിക്കുമ്പോള് അദ്ദേഹം പ്രകാശനം ചെയ്തു. ഷഷ്ടിപൂര്ത്തിയോടനുബന്ധിച്ച് തയ്യാറാക്കിയ സമകാലീന ഭാരതീയ നാട്യസാഹിത്യം 1987 ഫെബ്രുവരിയില് പി.വി.നരസിംഹറാവു പ്രകാശനം ചെയ്തു. ഇവയാണ് ഏറ്റവും വലിയ അംഗീകാരങ്ങള്.
* മറ്റ് അംഗീകാരങ്ങള് ?
# അനേകം ലഭിച്ചിട്ടുണ്ട്. കേന്ദ്ര വിദ്യാഭ്യാസ വകുപ്പിന്റെ അവാര്ഡ്,അന്തര്ദേശീയ കുസുമ് അവാര്ഡ് എന്നിവ ഇവയില് ചിലതാണ്.
* പ്രധാന പദവികള് ?
# കോഴിക്കോട് സര്വ്വകലാശാല ഹിന്ദി ബോര്ഡ് ഓഫ് സ്റ്റഡീസ് ചെയര്മാന്, സര്വ്വോദയ മണ്ഡല് പാലക്കാട് ചെയര്മാന്, കേരള സര്വ്വകലാശാല വിസിറ്റിംഗ് ലക്ചറര്, കേരള സ്കൂള് സിലബസ് പരിഷ്ക്കരണ ഉപദേശക സമിതി അംഗം, കേരള സര്വ്വകലാശാല സെനറ്റ് അംഗം തുടങ്ങി അനേകം ചുമതലകള് ഏറ്റെടുത്തിട്ടുണ്ട്
* ചിത്രരചന രംഗത്തെ താത്പ്പര്യം ?
# വലരെ ചെറുപ്പത്തിലെ ചിത്രരചനയില് താല്പ്പര്യമുണ്ടായിരുന്നു. മദ്രാസ് യൂണിവേഴ്സിറ്റിയില് നിന്നും പെയിന്റിംഗ്,ഫ്രീഹാന്ഡ് പരീക്ഷകള് പാസായി. 150 ല് അധികം ചിത്രങ്ങള് രചിച്ചിട്ടുണ്ട്. അനേകം എക്സിബിഷനുകള് നടത്തി. അനേകം അംഗീകാരങ്ങളും ലഭിച്ചു. പ്രസിദ്ധ ചിത്രകലാ നിരൂപകന് കെ.പി.പത്മനാഭന് തമ്പി ' ബുദ്ധിജീവിയായ ചിത്രകാരന്' എന്ന് അഭിന്ദിച്ചിട്ടുണ്ട്. അതാണ് ഈ രംഗത്തെ ഏറ്റവും വലിയ പുരസ്ക്കാരമെന്ന് ഞാന് വിശ്വസിക്കുന്നു.
* ഏത് തരം ചിത്രങ്ങളോടാണ് താല്പ്പര്യം ?
# കാഴ്ചക്കാര്ക്ക് മനസിലാകാത്ത,നിഗൂഢതകള് നിറഞ്ഞ ചിത്രങ്ങള് വരയ്ക്കാറില്ല. എന്നാല് പ്രതീകാത്മകതയോട് താത്പ്പര്യമുണ്ട്. 'പ്രകൃതിയും പുരുഷനും', ' വിശ്വപുരുഷന്', 'സംഹാരവും സംരക്ഷണവും' തുടങ്ങിയ ചിത്രങ്ങളില് അത് ഏറെ തെളിഞ്ഞുകാണാം. ' പ്രകൃതിയും പുരുഷനും' എന്ന ചിത്രം കല്ക്കത്തയില് നിന്നും പ്രസിദ്ധീകരിക്കുന്ന 'റിഥം' മാസികയില് അച്ചടിച്ചു വരുകയും ചെയ്തു.
യോഗസിദ്ധിയുടെ ഊര്ജ്ജവും കര്മ്മനിരതയുടെ പ്രസരിപ്പും കൊണ്ട് ശക്തനായി നില്ക്കുന്ന ഈ എഴുപതുകാരനില് നിന്നും രാജ്യത്തിന് ഇനിയും സാഹിത്യ-കലാ-സാമൂഹിക രംഗങ്ങളില് ഏറെ കാര്യങ്ങള് പ്രതീക്ഷിക്കാന് കഴിയുമെന്ന വിശ്വാസമാണ് ഹ്രസ്വമായ ഈ കൂടിക്കാഴ്ച നല്കിയത്.
