ഡല്‍ഹിയില്‍ കെ.മാധവന്‍ നായരുടെ നേതൃത്വത്തില്‍ ഇറക്കിയിരുന്ന ആഴ്ചപത്രമായിരുന്നു ന്യൂഡല്‍ഹി ഇന്ന്. ഒരിക്കല്‍ നിന്ന പത്രം രണ്ടാമത് പ്രസിദ്ധീകരണം തുടങ്ങിയെങ്കിലും അധികകാലം നടത്താന്‍ കഴിഞ്ഞില്ല. പിന്നീട് പലരും പത്രപരീക്ഷണം നടത്തിയിരുന്നു, എന്റെ സുഹൃത്ത് മാര്‍ട്ടിന്‍ ഉള്‍പ്പെടെ.ലക്ഷങ്ങള്‍ നഷ്ടപ്പെടുത്തിയ ശേഷം ശ്രമം ഉപേക്ഷിക്കയാണുണ്ടായത്. മനോരമയുടെയും മാതൃഭൂമിയുടെയും ഡല്‍ഹി എഡിഷന്‍ വന്നതോടെ അത്തരം പ്രാദേശിക പത്രങ്ങളുടെ പ്രസക്തിതന്നെ ഇല്ലാതായി. ഒരു പഴയ ഫയലില്‍കണ്ടെത്തിയ, ന്യൂഡല്‍ഹി ഇന്നില്‍ ഞാനെഴുതിയ ഒരാസ്വാദനം ഇവിടെ കുറിക്കട്ടെ. ആ കാലഘട്ടത്തില്‍ ഡല്‍ഹിയിലുണ്ടായിരുന്ന, പ്രത്യേകിച്ചും ജനസംസ്‌കൃതിക്കാര്‍ക്ക് ഓരോര്‍മ്മയുണര്‍ത്തലാകും
ശതാഭിഷേകം വേദിയിലെത്തിയപ്പോള്‍
എസ്.രമേശന്‍ നായര്‍ രചിച്ച് കെ.എസ്.റാണാപ്രതാപന്‍ സംവിധാനം ചെയ്ത് ആകാശവാണി പ്രക്ഷേപണം ചെയ്ത നാടകമാണ് ശതാഭിഷേകം. ഏറെ വിവാദങ്ങള്‍ക്ക് തിരി കൊളുത്തിയ ഈ നാടകത്തിന്റെ രംഗാവിഷ്‌ക്കാരം ഈയിടെ ഡല്‍ഹിയില്‍ അരങ്ങേറി. കോപ്പര്‍ നിക്കസ് മാര്‍ഗ്ഗിലെ എല്‍ടിജി ആഡിറ്റോറിയത്തില്‍ അവതരിപ്പിച്ച നാടകം സംവിധാനം ചെയ്തത് എം.വി.സന്തോഷാണ്.
തറവാട് കാരണവരായ കിട്ടുമ്മാവന്‍,സ്വന്തം അധികാരം നിലനിര്‍ത്താനായി നടത്തുന്ന തന്ത്രങ്ങളാണ് നാടകത്തിന്റെ കേന്ദ്രബിന്ദു. ഭാര്യ ഭരണാക്ഷിയമ്മയും ആശ്രിതന്‍ ഏഷണികുമാരനും അജകുമാറും ചില അനന്തിരവരും അമ്മാവന് സ്തുതിപാടി തന്‍കാര്യം നേടുമ്പോള്‍, കുറേ അനന്തിരവന്മാര്‍ അമ്മാവന്റെ ഏകാധിപത്യ ഭരണത്തെ എതിര്‍ക്കുന്നു. എന്നാല്‍ ആ എതിര്‍പ്പ് ശക്തിമത്തല്ല. കുറച്ചു പൊന്നും പണവും കൈയ്യില്‍ കിട്ടുമ്പോള്‍ അവര്‍ സംതൃപ്തരായി മടങ്ങുന്നു. അല്‍പ്പനാള്‍ കഴിയുമ്പോള്‍ വീണ്ടും അസ്വസ്ഥരായി ശബ്ദമുയര്‍ത്തുന്നു.
പൊതുവെ ജനാധിപത്യ ഭരണക്രമത്തില്‍ കണ്ടുവരാറുള്ള താളങ്ങളും അവയുടെ ക്രമം തെറ്റലും ഒരു തറവാടിന്റെ പശ്ചാത്തലത്തില്‍ ഉയര്‍ത്തികാട്ടുന്ന ഈ നാടകത്തില്‍, മന്ദബുദ്ധിയായ വളര്‍ത്തുമകന്‍ കിങ്ങിണിക്കുട്ടന്‍, കാലം കണ്ട സ്വേച്ഛാധിപതികളുടെ ദൗര്‍ബ്ബല്യത്തിന്റെ പ്രതീകമാകുന്നു.
റേഡിയോ നാടകം , രംഗത്ത് അവതരിപ്പിക്കുക ഒട്ടേറെ വിഷമതകളുള്ള കാര്യമാണ്. ശബ്ദക്രമീകരണം കൊണ്ടുമാത്രം സൃഷ്ടിക്കാന്‍ കഴിയുന്ന നാടകാന്തരീക്ഷത്തെ പ്രേക്ഷകന്റെ കണ്ണിനുമുന്നില്‍ എത്തിക്കുമ്പോള്‍ , മുഷിവ് കൂടാതെ ഒരു മണിക്കൂറിലധികം നാടകം കണ്ടുകൊണ്ടിരിക്കാന്‍ കഴിയുംവിധം അതിനെ സജ്ജമാക്കേണ്ടതുണ്ട്. സംവിധായകന്‍ സന്തോഷ് ഇക്കാര്യത്തില്‍ വിജയിച്ചു എന്ന് സംശയലേശമെന്യെ പറയാം.
ഇരുപത്തിയഞ്ചോളം കഥാപാത്രങ്ങളെ മെരുക്കിയെടുത്ത് രംഗത്ത് കൊണ്ടുവരിക ശ്രമകരമായ ജോലിതന്നെയാണ്. കുടുംബപശ്ചാത്തലത്തില്‍ പറഞ്ഞുവരുന്ന കഥയാണെങ്കിലും ആധുനിക നാടകത്തിന്റെ ചിട്ടകളും സന്നിവേശിപ്പിക്കാന്‍ സംവിധായകന്‍ ശ്രദ്ധിച്ചിട്ടുണ്ട്.
കിട്ടുമ്മാവനായി രംഗത്തുവന്ന സന്തോഷ്, കിങ്ങിണിക്കുട്ടനെ അവതരിപ്പിച്ച രവി, ഏഷണികുമാരനായി വന്ന മുരളി, അനന്തിരവരായ പ്രദീപ്,സുനില്‍ തുടങ്ങിയവര്‍ മെച്ചപ്പെട്ട അഭിനയം കാഴ്ചവച്ചു. റേഡിയോ നാടകത്തില്‍ തിളങ്ങിനിന്ന ഭരണാക്ഷിയമ്മ രംഗത്ത് പരാജയമായി. വെളിച്ച ക്രമീകരണത്തിലെ ചില അപാകതകള്‍ ഒഴിച്ചാല്‍ , നാടകം പൊതുവെ നന്നായി. ഡല്‍ഹി മലയാളികള്‍ക്ക് അഭിമാനിക്കാന്‍ കഴിയുന്ന ഒരു നാടക സംഘമാണ് സന്തോഷിന്റേത്.
ജനസംസ്‌ക്ൃതി കൊണാട്ട് പ്ലേസ് ഏരിയ 13ാം വാര്‍ഷികാഘോഷത്തോടനുബന്ധിച്ചാണ് നാടകം അവതരിപ്പിച്ചത്. വാര്‍ഷിക പരിപാടികള്‍ ജസ്റ്റീസ് പി.സുബ്രഹ്മണ്യന്‍ പോറ്റി ഉത്ഘാടനം ചെയ്തു. ജനസംസ്‌കൃതി വൈസ്പ്രസിഡന്റ് ദാമോദരന്‍ അധ്യക്ഷം വഹിച്ചു. സിന്ധു പരമേശ്വരന്‍, വിനീത് വിജയന്‍ എന്നിവര്‍ കഥകളിയും ഉഷാനായര്‍, വിജയലക്ഷ്മി എന്നിവര്‍ ഭരതനാട്യവും അവതരിപ്പിച്ചു.
No comments:
Post a Comment