The Psychology Behind Vishu

 

വിഷുവിന്‍റെ മന:ശാസ്ത്രം

-----------------------------------

n  വി.ആർ.അജിത് കുമാർ

---------------------------------

 (2026 ഏപ്രിൽ 14 തനിനിറം വിഷുപ്പതിപ്പിൽ പ്രസിദ്ധീകരിച്ചത്)

എല്ലാ ആഘോഷങ്ങള്‍ക്കും ഒരു മന:ശാസ്ത്രപരമായ വശമുണ്ട്.ഓണം നിറസമൃദ്ധിയുടെ ആഘോഷമാകുന്നപോലെ വിഷു പ്രതീക്ഷയുടെ ആഘോഷമാണ്.അത് നൽകുന്ന പോസിറ്റീവായ മാനസ്സികാവസ്ഥ ദിവസങ്ങളോളം നമ്മെ ഉത്സാഹചിത്തരാക്കും.നമ്മൾ ആദ്യം കാണുന്ന കാര്യങ്ങൾ നമ്മുടെ ഉപബോധമനസ്സിനെ സ്വാധീനിക്കും എന്നൊരു തത്വമുണ്ട്.വിഷുക്കണി അത്തരത്തിലൊന്നാണ്.അത് വെറുമൊരു കണിയല്ല,ആ കാഴ്ച സമൃദ്ധിയെ ദൃശ്യവൽക്കരിക്കലാണ്. കണ്ണുതുറക്കുമ്പോൾ കാണുന്ന സ്വർണ്ണനിറവും ഐശ്വര്യവും ഒരു മനുഷ്യനിൽ വർഷം മുഴുവൻ നിലനിൽക്കേണ്ട ആത്മവിശ്വാസമാണ് നിറയ്ക്കുന്നത്.മനശാസ്ത്രപരമായി മഞ്ഞനിറം സന്തോഷം, പ്രത്യാശ, ഊർജ്ജം എന്നിവയെ സൂചിപ്പിക്കുന്നതാണ്.കൊന്നപ്പൂക്കളുടെ  മഞ്ഞപ്പൊലിമ വേനൽക്കാലത്തെ തളർച്ചയെ മാറ്റി മനസ്സിനെ ഉന്മേഷമുള്ളതാക്കുന്നു. പ്രകൃതി കരിഞ്ഞുണങ്ങുമ്പോഴും പൂത്തുനിൽക്കുന്ന കൊന്ന, പ്രതിസന്ധികളിലും അതിജീവിക്കാനുള്ള കരുത്തിനെയാണ് ഓർമ്മിപ്പിക്കുന്നത്.വിഷുക്കൈനീട്ടവും സന്തോഷത്തിന്‍റെയും ധനത്തിന്‍റെയും പങ്കുവെക്കലാണ്.കൈനീട്ടം നൽകുന്നതിലൂടെ മുതിർന്നവരിൽ താൻ മറ്റുള്ളവരെ സഹായിക്കാൻ പ്രാപ്തനാണ്  എന്ന സംതൃപ്തിയും, വാങ്ങുന്ന ഇളയവരിൽ താൻ കരുതപ്പെടുന്നു എന്ന സുരക്ഷിതബോധവും ഉണ്ടാകുന്നു. ഇത് കുടുംബാംഗങ്ങൾ തമ്മിലുള്ള വൈകാരിക ബന്ധം ശക്തമാക്കുന്നു.ഇന്നലെ വരെയുള്ളതല്ല ഇനി വരുന്ന ദിനങ്ങള്‍ എന്ന പ്രതീക്ഷയാണ് പുതുവസ്ത്രങ്ങള്‍ അണിയുന്നതിലൂടെ നല്‍കുന്നത്.

കാർഷിക കലണ്ടറിന്‍റെ ഭാഗമായ വിഷു,ഇനി വരാനിരിക്കുന്നത് നല്ല കാലമാണ് എന്ന ശുഭപ്രതീക്ഷയാണ് പകർന്നു നൽകുന്നത്. പൊതുവെ പ്രതീക്ഷകള്‍ക്ക് മങ്ങലേൽക്കുന്ന പുതിയ കാലത്ത് ഇത്തരമാഘോഷങ്ങള്‍ ജാതി മതങ്ങള്‍ക്കതീതമായി മനുഷ്യർ ആഘോഷിക്കേണ്ടതാണ്.അത് നൽകുന്ന ശുഭകരമായ ഊർജ്ജം നമ്മെ മുന്നോട്ടു നയിക്കുമെന്നതിൽ സംശയമില്ല.