Who is crazy? Trump or unauthorized migrants 🤔

 

ആര്‍ക്കാണ് ഭ്രാന്ത് ?

ഫെബ്രുവരി ഏഴിന്‍റെ മനോരമ പത്രത്തിലെ തലക്കെട്ട് ചങ്ങലയിട്ട ഭ്രാന്ത് എന്നായിരുന്നു.നിയമരഹിതമായി ഒരു കാര്യവും ചെയ്യാന്‍ ധൈര്യമില്ലാത്ത ഞാന്‍ കുറേനേരം ഇരുന്നാലോചിച്ചു.45-50 ലക്ഷം രൂപ മുടക്കി കടലും കരയും കാടും താണ്ടി പലിവിധ പീഢനങ്ങള്‍ സഹിച്ച് അനധികൃതമായി അമേരിക്കയിലേക്ക് പോകാന്‍ എനിക്ക് ആഗ്രഹം തോന്നുമായിരുന്നോ. ഒരിക്കലുമില്ല എന്നായിരുന്നു എന്‍റെ മറുപടി.വിദേശ രാജ്യങ്ങള്‍ കാണാന്‍ പോകണം എന്നല്ലാതെ അവിടെ തികച്ചും ഒരന്യനെപോലെ താമസിക്കാന്‍ എനിക്കൊരിക്കലും ആഗ്രഹം തേന്നിയിട്ടില്ല. എന്നുമാത്രമല്ല,മക്കളെയോ ബന്ധുക്കളെയോ അയയ്ക്കണം എന്ന് തീരുമാനിച്ചാലും എംബസ്സി വഴി പേപ്പറുകള്‍ ശരിയാക്കിയെ അയയ്ക്കുകയുള്ളു. അക്കരപ്പച്ച തേടി ബോട്ടില്‍ കയറി എഴുപതുകളിലും മറ്റും ഗള്‍ഫില്‍ പോയി സമ്പന്നരായവരുടെ ഒക്കെ കഥ കേട്ടിട്ടുണ്ട്. ഇന്ന് അത്തരത്തില്‍ സൌദിയിലോ ദുബായിലോ എത്തുന്നവരുടെ സ്ഥിതി എന്താകും. അതിനേക്കാളും ഭീകരമാകുമല്ലോ ലോകത്തിന്‍റെ നെറുകയിലാണ് എന്നഹങ്കരിക്കുന്ന അമേരിക്കയുടെ സമീപനം.രാവിലെ വെറുതെ ഒരു സ്കൂളില്‍ കയറി തോക്കുപയോഗിച്ച് പത്തുപേരെ വെടിവച്ചു കൊല്ലാം എന്ന് ചിന്തിക്കുന്ന തരം ഭ്രാന്തന്മാരും വസിക്കുന്ന ഇടമാണ് അമേരിക്ക. ഒരു നിയമവുമില്ലാത്ത കാലത്ത് അമേരിക്കയിലെത്തി റെഡ് ഇന്ത്യന്‍സിന്‍റെ കൊന്നുതള്ളി നാട് സ്വന്തമാക്കിയ കുടിയേറ്റക്കാരുടെ പിന്മുറക്കാരല്ലെ ഇപ്പോള്‍ നമ്മള്‍ കാണുന്ന അമേരിക്കക്കാര്‍ എന്ന് ചോദിച്ചാല്‍ മറുപടി പറയാന്‍ അവര്‍ ബുദ്ധിമുട്ടിയേക്കും. എങ്കിലും നിലവില്‍ ശക്തമായ നിയമ ചട്ടക്കൂട് ഉള്ള ഒരു രാജ്യത്ത് അതിര്‍ത്തിയിലൂടെ കടന്നുകയറിയവരെ ഏത് വിധമാകും ട്രീറ്റ് ചെയ്യുക എന്ന് പ്രത്യേകം പറയേണ്ടതില്ല.ഇന്ത്യ മ്യാന്‍മാറില്‍ നിന്നും ബംഗ്ലാദേശില്‍ നിന്നും അതിര്‍ത്തി കടന്നെത്തുന്നവരെ പിടികൂടുമ്പോള്‍ ബൊക്കെയും പൂവും നല്‍കി സ്വീകരിക്കാറില്ല എന്നും ഓര്‍ക്കുക. വെടിവച്ചു കൊല്ലുന്നതിന് പകരം അനധികൃത കുടിയേറ്റക്കാരെ ഇന്ത്യയില്‍ എത്തിച്ചു എന്നതില്‍ ആശ്വസിക്കുകയാണ് ഞാന്‍. ഒപ്പം നാടിന് നാണക്കേടുണ്ടാക്കിയ ഇവരോട് അരിശവും തോന്നുന്നു. ഈ വിഷയത്തിന് ഇത്രയേറെ പ്രാധാന്യം പഞ്ചാബിലും ഹരിയാനയിലും ഗുജറാത്തിലുമൊക്കെ ലഭിച്ചു എങ്കില്‍ നന്നായിരുന്നു. ഇനി ആരും ഇത്തരം ക്രിമിനല്‍ കുറ്റം ചെയ്യാതിരിക്കാനുള്ള പ്രേരണയാകും ഇത് നല്കുക✍️