സിപിഎം മുന്നോട്ടുവയ്ക്കുന്ന അജണ്ട-
ഒരു സാധാരണക്കാരനായ മലയാളിയുടെ രാഷ്ട്രീയ നിരീക്ഷണം
സംസ്ഥാനത്തെ ഏറ്റവും പ്രബലമായ പാര്‍ട്ടി ഇന്ന് സിപിഎം ആണ്. അതിന്റെ സംസ്ഥാന സമ്മേളനം നടക്കുകയാണ് എറണാകുളത്ത്. ദേശീയ സമ്മേളനം ഭാവിയില്‍ നടക്കുന്നത് കണ്ണൂരുമാണ്. എല്‍ഡിഎഫിന്റെ രണ്ടാം വരവോടെ കേരളത്തില്‍ പാര്‍ട്ടി എന്നാല്‍ സഖാവ് പിണറായി വിജയന്‍ ആണ്. അദ്ദേഹം അധികാരത്തില്‍ എത്തിയശേഷം വികസന അജണ്ടയില്‍ മാത്രമാണ് ശ്രദ്ധ കേന്ദ്രീകരിക്കുന്നത്. ഇന്ത്യയില്‍ മൊത്തമായി എടുത്താലും പാര്‍ട്ടി ഇന്ന് ശക്തമായി നിലനില്‍ക്കുന്നത് കേരളത്തില്‍ മാത്രമാണ്. പിണറായി വിജയന്‍ എന്ന നേതാവിന് ചുറ്റിലുമായി കറങ്ങുകയാണ് പാര്‍ട്ടി. പണ്ടേ ചൈനീസ് കമ്മ്യൂണിസത്തിനെ താലോലിച്ചവരാണ് സിപിഎം. ഇന്നും അങ്ങിനെതന്നെയാണ്. ചൈനയില്‍ ഇപ്പോള്‍ പാര്‍ട്ടി എന്നാല്‍ അതിന്റെ നേതാവും ഭരണാധികാരിയുമായ Xi Jinping ആണ്. ഇവിടെ അധികാരത്തിന് പുറത്തു നില്‍ക്കുന്ന സീതാംറാം യച്ചൂരി ഉള്‍പ്പെടെയുള്ള നേതാക്കള്‍ക്ക് പാര്‍ട്ടിയെ മുന്നോട്ട് കൊണ്ടുപോകണമെങ്കില്‍ സഖാവ് പിണറായിയെ ആശ്രയിച്ചേ പറ്റൂ. പിണറായി കേരളത്തില്‍ വിഭാഗീയത തുടച്ചുമാറ്റി Xi Jinping പോലെ ഏകാധിപതി ആയിരിക്കയാണ്. പാര്‍ട്ടിയില്‍ ഏതെങ്കിലും തരത്തില്‍ കുഴപ്പമുണ്ടാക്കാന്‍ സാധ്യതയുള്ള എം.എ.ബേബി, തോമസ് ഐസക് , സുധാകരന്‍ തുടങ്ങിയ വ്യക്തിത്വങ്ങള്‍ക്ക് അവരര്‍ഹിക്കുന്ന സ്ഥാനമാനങ്ങള്‍ മാത്രം നല്‍കി ഒതുക്കിയിരിക്കയാണ്. പണ്ട് വിപ്ലവം നക്‌സല്‍ബാരിയില്‍ നിന്നും എന്നു പറഞ്ഞപോലെ ,സിപിഎം എന്നാല്‍ കണ്ണൂര്‍ ജില്ലയെ ചുറ്റിപ്പറ്റിയുള്ള ഒരു സംവിധാനമായി മാറി. തീര്‍ച്ചയായും സ്വാനുഭവത്തിലൂടെ പിണറായി ആര്‍ജ്ജിച്ച ഒരു വിശ്വാസമാകാം ഇതിന് കാരണം. കണ്ണൂരിനപ്പുറം ഒരാളെയും വിശ്വസിക്കാന്‍ കഴിയാത്തവിധം പാര്‍ട്ടിയിലെ പലരേയും മാറ്റി നിര്‍ത്തേണ്ടതുണ്ട്. അത് അദ്ദേഹത്തെ സംബ്ബന്ധിച്ചിടത്തോളം ശരിയായ നിലപാട് ആണ് താനും.
കൊടിയേരിയാണ് വിശ്വസിക്കാന്‍ ഏറ്റവും മികച്ചയാള്‍ എന്ന തിരിച്ചറിവ് അദ്ദേഹത്തിനുണ്ട്. അജണ്ടകള്‍ നിശ്ചയിക്കുന്നതും പ്രസ്ഥാനത്തെ മുന്നോട്ടു നയിക്കുന്നതും ആ ഒരു വെളിപാടിന്റെ അടിസ്ഥാനത്തിലാണ്. ഇന്ത്യയിലെ പ്രധാന പ്രാദേശിക പാര്‍ട്ടികളായ ബിജു ജനതാ ദളും ചന്ദ്രശേഖര റാവുവിന്റെ തെലങ്കാന പാര്‍ട്ടിയും ആന്ധ്രയിലെ വൈഎസ്ആര്‍ കോണ്‍ഗ്രസും യുപിയിലെ സമാജ് വാദി പാര്‍ട്ടിയും ഒരു പരിധിവരെ കോണ്‍ഗ്രസും ഉള്‍പ്പെടുന്ന ബഹുഭൂരിപക്ഷം പ്രസ്ഥാനങ്ങളും ഇത്തരത്തില്‍ തന്നെയാണ് മുന്നോട്ടുപോകുന്നതും. ഇവിടെ അധികാരവും സമ്പത്തും വലിയ ഘടകമാണ്. ആദര്‍ശം ഇന്നൊരു നനഞ്ഞ പടക്കം മാത്രമാണ്. ഭൂതകാലം തുറന്നുനോക്കാന്‍ പോലും കൊള്ളാത്തത്ര മലീമസമായ പുസ്തകവും. വര്‍ത്തമാന കാലവും ഭാവിയും മാത്രമെ ഒരു ഭരണാധിപന് മുന്നിലുള്ളൂ. അതില്‍ രണ്ട് കാര്യങ്ങളാണ് ചര്‍ച്ച ചെയ്യപ്പെടാനുള്ളത്. ഒന്ന് അധികാരത്തിന്റെ തുടര്‍ച്ച. രണ്ട് വികസനത്തിലൂന്നിയ ശക്തമായ സമൂഹത്തെ കെട്ടിപ്പടുക്കല്‍.
ഭരണത്തുടര്‍ച്ചയാണ് ജനാധിപത്യത്തില്‍ പ്രധാനം. അതിനുള്ള അവസരങ്ങളെ ബുദ്ധിപൂര്‍വ്വം ഉപയോഗിക്കുക എന്നത് ബുദ്ധിമാന്മാരുടെ ലക്ഷണമാണ്. വര്‍ഗ്ഗ സമരം എന്ന കാള്‍ മാക്‌സിന്റെയും ലെനിന്റെയും മാവോയുടെയും അജണ്ടയില്‍ നിന്നും മാറി പ്രായോഗിക രാഷ്ട്രീയത്തിന്റെ അജണ്ടയായ വര്‍ഗ്ഗീയതയെ മുറുകെ പിടിക്കാനുള്ള പാര്‍ട്ടി തീരുമാനം ശ്രദ്ധേയമാണ്. കൊടിയേരി സംസാരിക്കുന്നത് ഇപ്പോള്‍ വര്‍ഗ്ഗ സമരത്തെ കുറിച്ചല്ല, ഇടതുപക്ഷം ന്യൂനപക്ഷ സമുദായത്തെ പരമാവധി പാര്‍ട്ടിയില്‍ എത്തിക്കുക എന്നതാണ് ലക്ഷ്യമിടുന്നതെന്ന് അദ്ദേഹം പറഞ്ഞു കഴിഞ്ഞു. അതോടൊപ്പം ചേര്‍ത്തു വായിക്കാവുന്നതാണ് 25 വര്‍ഷത്തേക്കുളള കേരളത്തെ മുന്നില്‍ കണ്ടുള്ള വികസന ചര്‍ച്ചകളും. ഒന്നുറപ്പാണ്, ന്യൂനപക്ഷത്തെ ഒരു കൊടിക്കീഴില്‍ എത്തിക്കാനും ന്യൂനപക്ഷ സംരക്ഷണമാണ് യഥാര്‍ത്ഥ മതേതരത്വം എന്നു വിശ്വസിക്കുന്ന ഒരു നല്ല പങ്ക് ഭുരിപക്ഷ സമുദായ അംഗങ്ങളെ ഒപ്പം നിര്‍ത്താന്‍ കഴിയുകയും ചെയ്താല്‍ 25 വര്‍ഷത്തേക്ക് ഭരണം മിനിമം ഗ്യാരണ്ടിയാണ്. മുസ്ലിം ലീഗിനെ ഒപ്പം കൂട്ടുക എന്നത് പാര്‍ട്ടിയുടെ പഴയ അജണ്ടയാണ്. നായനാര്‍ ആയിരുന്നു അതിന്റെ ഉപജ്ഞാതാവ്, പക്ഷെ പണി കിട്ടിയത് എം.വി.രാഘവനും. ഇപ്പോള്‍ അത്തരത്തിലുള്ള പണികള്‍ കൊടുക്കാന്‍ ഈഎംഎസ് പോലെ ആരുമില്ലാത്തതിനാല്‍ , അണികള്‍ പൂര്‍ണ്ണമായും കൊഴിഞ്ഞ് തീവ്രവാദ സംഘടനകളില്‍ പോകും മുന്നെ ലീഗ് ഇടതുപക്ഷത്തേക്ക് വരുമെന്നത് ഉറപ്പ്. അതിനുള്ള കരുക്കള്‍ നീങ്ങിത്തുടങ്ങി എന്നത് നിഷേധിക്കാന്‍ കഴിയാത്ത സത്യമാണ്. അത് യുഡിഎഫിന് ഏല്‍പ്പിക്കുന്ന ആഘാതം വളരെ വലുതാകും. ജോസ്.കെ.മാണി പോയതിലും വലിയ ഭൂമികുലുക്കം. കാല്‍ചുവട്ടിലെ മണ്ണ് ഒന്നാകെ ഒലിച്ചുപോകും പോലെയാകും യുഡിഎഫിന്. ഈ മാറ്റത്തോടെ , പരമ്പാരഗത ശത്രുവായ വലതുകമ്മ്യൂണിസ്റ്റുകാരെ സഖ്യത്തില്‍ നിന്നും പുറത്താക്കുകയൊ നിശബ്ദമാക്കുകയോ ചെയ്യാം എന്നതാണ് സിപിഎമ്മിന് ഉണ്ടാക്കുന്ന വലിയ നേട്ടം.ഇത് ആഗ്രഹിക്കാത്ത ഒരു മാര്‍ക്‌സിസ്റ്റുകാരനും ഇന്ന് ജീവിച്ചിരിക്കുന്നുണ്ടാവില്ല. പരിസ്ഥിതിയും മറ്റ് ഉടായിപ്പുകളുമായി എപ്പോഴും പാര്‍ട്ടിയെയും നേതാവിനെയും സമ്മര്‍ദ്ദത്തിലാക്കുന്ന തലവേദന ഒഴിവാക്കുക എന്നത് ചെറുതല്ലല്ലോ.
കോണ്‍ഗ്രസ് എന്ന പ്രസ്ഥാനം സിപിഎമ്മിനും ബിജെപിക്കും ഒരുപോലെ ചതുര്‍ത്ഥിയുള്ള പ്രസ്ഥാനമാണ്. രാജ്യത്തെ മറ്റെല്ലായിടത്തെയും എന്നപോലെ കേരളത്തെയും കോണ്‍ഗ്രസ് മുക്തമാക്കണം എന്ന് ബിജെപി ആഗ്രഹിക്കുന്നു. കേരളത്തിലെ സിപിഎമ്മും ആഗ്രഹിക്കുന്നത് അതുതന്നെയാണ്. ബംഗാള്‍ ഉള്‍പ്പെടെ മറ്റ് സംസ്ഥാനങ്ങളില്‍ പാര്‍ട്ടി ദുര്‍ബ്ബലമായതിനാല്‍ അവര്‍ അങ്ങിനെ ആഗ്രഹിക്കുന്നുണ്ടാവില്ല. ഇത്തരമൊരു അജണ്ടയില്‍ പ്രവര്‍ത്തിക്കുന്നു എന്നതുകൊണ്ടുതന്നെ ബിജെപിയുടെ കേന്ദ്ര നേതൃത്വം ആഗ്രഹിക്കുന്നതും യുഡിഎഫിന്റെ തകര്‍ച്ചയാണ്. അതിന് അനുഗുണമായ പ്രവര്‍ത്തനങ്ങള്‍ സിപിഎം ചെയ്യുമ്പോള്‍, പ്രാദേശികമായ ചില രക്തസാക്ഷികളുടെ സൃഷ്ടിപ്പുകളൊക്കെ ,രാഷ്ട്രീയ അജണ്ടയുടെ ഭാഗമായുണ്ടാകുമെങ്കിലും സിപിഎം ഭരിക്കുന്ന കേരളത്തെയാണ് ബിജെപി ഇഷ്ടപ്പെടുന്നത്. ഇപ്പോള്‍ ലക്ഷ്യമിടുന്ന വിധം കാര്യങ്ങള്‍ മുന്നോട്ടുപോവുകയാണെങ്കില്‍, ഭാവിയില്‍ പ്രധാന പ്രതിപക്ഷമാകാന്‍ എന്‍ഡിഎയ്ക്കും കഴിയും. അല്ലാതെ പ്രവര്‍ത്തിച്ചു കയറിവരാനുളള ശേഷിയും ശേമുഷിയും ബിജെപിക്കില്ല എന്ന് ദേശീയ നേതൃത്വം മനസിലാക്കി കഴിഞ്ഞു.
ഇനി ഭരണത്തുടര്‍ച്ചയോടൊപ്പം വികസനവും സമ്പത്താര്‍ജ്ജിക്കലുമാണ്. കേരള സിപിഎം ഇന്ന് രാജ്യത്തെ സമ്പന്നരായ ഏതൊരു വ്യക്തിയേയും പോലെ സാമ്പത്തികമായും ആസ്ഥിപരമായും ശക്തമാണ്. ഇത് പൂര്‍വ്വാധികം ശക്തമായി തുടരുക എന്നതും പാര്‍ട്ടി പ്രവര്‍ത്തകരെ സാമ്പത്തികമായി ശാക്തീകരിക്കുക എന്നതും പാര്‍ട്ടിയുടെ നിലനില്‍പ്പിനും ശക്തിക്കും അനിവാര്യമാണ്. അത് ചൈനയുടെ സമീപനവുമാണ. ചൈനയിലെ സമ്പന്നരെല്ലാം പാര്‍ട്ടിയിലെ ഉന്നതരാണ്. അത്തരത്തിലുളള ഒരു സംവിധാനത്തിലേക്ക് പാര്‍ട്ടി മാറുകയാണ്. മുതലാളിത്തത്തില്‍ ഊന്നിയുള്ള കമ്മ്യൂണിസം എന്ന Xi Jingping നയമാണ് പാര്‍ട്ടി പിന്‍തുടരുന്നത്. മുതലാളികളുമായി പങ്കാളിത്തമില്ലാതെ നാട് വികസിക്കുകയില്ല. അതിന് ആവശ്യമായ അടിസ്ഥാന സൗകര്യ വികസനമാണ് സില്‍വര്‍ ലൈന്‍ ഉള്‍പ്പെടെയുള്ള പദ്ധതികള്‍. വ്യവസായവും കച്ചവടവും നടത്തുന്നവരെ ബുദ്ധിമുട്ടിക്കുന്ന മൂരാച്ചി സ്വഭാവം നഷ്ടമായിട്ടില്ലാത്ത ട്രേയ്ഡ് യൂണിയന്‍ നേതാക്കന്മാര്‍ക്കും അണികള്‍ക്കും മുഖ്യമന്ത്രി താക്കീത് നല്‍കി കഴിഞ്ഞു. അനുസരിക്കുക എന്നതാണ് കൃത്യമായ പാര്‍ട്ടി നയം. അതുണ്ടാവും, ഉണ്ടായേ തീരു. അതോടെ വികസനവും എല്ലാ രംഗത്തും ശാക്തീകരണവും നടപ്പിലാകുന്ന ഒരു സംസ്ഥാനമായി കേരളം മാറും. അമേരിക്കയും യൂറോപ്പുമായാണ് എല്ലാക്കാലത്തും കേരളം താരതമ്യപ്പെടുത്താറുള്ളത്. അതുതന്നെയാണ് ശരിയും. താത്ക്കാലിക നേട്ടത്തിനായുള്ള കൊലപാതക രാഷ്ട്രീയം അവസാനിപ്പിച്ച് ബിജെപിയും സിപിഎമ്മും നാടിന്റെ വികസന ലക്ഷ്യങ്ങള്‍ക്കായി മുന്നോട്ടു പോകുമെങ്കില്‍ പാരിസ്ഥിതികമായ ആഘാതങ്ങള്‍ വര്‍ദ്ധിക്കുമെങ്കിലും പുരോഗമനം കാംക്ഷിക്കുന്ന മനുഷ്യര്‍ക്ക് അനുഗുണമായ ഒരു നാടായി ഇത് മാറും. ഉന്നത വിദ്യാഭ്യാസ മേഖലയില്‍ വരുത്തുന്ന മാറ്റങ്ങള്‍ സ്വാഗതാര്‍ഹമാണ്. എന്നാല്‍ പ്രൈമറി തലം മുതല്‍ കേന്ദ്രസര്‍ക്കാര്‍ കൊണ്ടുവരുന്ന വിദ്യാഭ്യാസ പരിഷ്‌ക്കരണം കൂടി അംഗീകരിക്കാന്‍ പാര്‍ട്ടി തയ്യാറാകണം. അതിന് പത്തു വര്‍ഷം കാത്തിരിക്കേണ്ടി വരുന്നത് കൂടുതല്‍ അപകടമാകും ഈ രംഗത്ത് ഉണ്ടാക്കുക.
ഏതായാലും മാറുന്ന കേരളമാകും നവകേരളം എന്നതില്‍ സംശയമില്ല. ദീര്‍ഘനാള്‍ തുടര്‍ച്ചയായി കേരളം ഭരിക്കാനുളള സാഹചര്യം സിപിഎമ്മിന് സംജാതമാകുകയാണ്. അത് പശ്ചിമ ബംഗാളിന് സംഭവിച്ചപോലെ ആകില്ല എന്നതും ഉറപ്പ്. സഖാവ് പിണറായിക്കും സിപിഎമ്മിനും ആശംസകള്‍ നേരുന്നു !! ലാല്‍ സലാം !!
No comments:
Post a Comment