ആളുകളെ നഗ്നരായി കാണാന്‍
1984 ല്‍ ഫാസില്‍ സംവിധാനം ചെയ്ത് സൂപ്പര്‍ഹിറ്റായ ചിത്രമാണ് നോക്കെത്താ ദൂരത്ത് കണ്ണുംനട്ട്. പത്മിനിയും അന്ന് പുതുമുഖ നടിയായി രംഗത്തുവന്ന നാദിയാ മൊയ്തുവും മോഹന്‍ലാലും തകര്‍ത്തഭിനയിച്ച ആ ചിത്രത്തില്‍ നാദിയ വച്ചിരിക്കുന്ന കണ്ണടയിലൂടെ മനുഷ്യരെ നഗ്നരായി കാണാം എന്നു പറയുമ്പോള്‍ തന്‍റെ നഗ്നത മറയ്ക്കാന്‍ ശ്രമിക്കുന്ന മോഹന്‍ലാലിന്‍റെ ഭാവങ്ങള്‍ മറക്കാന്‍ കഴിയുന്നതല്ല. ആ കാലത്ത് ഇത്തരം കണ്ണടയുണ്ട് എന്നും വെറും സാങ്കല്‍പ്പിക കഥയാണെന്നും വ്യത്യസ്ത അഭിപ്രായങ്ങളുണ്ടായി. എങ്കിലും ലോകകമ്പോളം പരിചിതമല്ലാതിരുന്ന, ആഗോളവത്ക്കരണത്തിനും സ്വകാര്യവത്ക്കരണത്തിനും മുന്നെയുള്ള ആ കാലത്ത്, ഗള്‍ഫില്‍ നിന്നും വന്ന കറുത്ത കണ്ണടക്കാരെ സംശയത്തോടെയായിരുന്നു പലരും വീക്ഷിച്ചിരുന്നത്. പ്രത്യേകിച്ചും തുറിച്ചുനോട്ടത്തിന് കേസ്സെടുക്കുന്ന കാലമല്ലാതിരുന്നതിനാല്‍, സ്ത്രീകളെ തുറിച്ചുനോക്കുന്ന കണ്ണടക്കാരുടെ എണ്ണവും ധാരാളമായിരുന്നു. പിന്നീട് ഇടയ്ക്കിടെ ഇത്തരം വാര്‍ത്തകളും ഗോസിപ്പുകളും വരിക പതിവായിരുന്നു.
ഇങ്ങിനെ ഒരു കണ്ണട സ്വന്തമാക്കണം എന്നാഗ്രഹിക്കുന്നതില്‍ തെറ്റു പറയാന്‍ കഴിയില്ല. പ്രത്യേകിച്ചും അധ്വാനിക്കാതെ ലഭിച്ച പണമുള്ളവര്‍ക്ക്. ഈ ദൌര്‍ബ്ബല്യത്തെ ചൂഷണം ചെയ്യുന്നവരുണ്ടാകാം. പലരും പറ്റിക്കപ്പെട്ടിട്ടും ഉണ്ടാകും. അത്തരത്തിലുള്ള ഒരു സംഘം ഈയിടെ ചെന്നൈയില്‍ പിടിയിലായി. ബംഗലൂരുവാസിയായ സൂര്യയാണ് ആസൂത്രകന്‍.സഹായികള്‍ മലയാളികളും. തൃശൂര്‍ നിന്നുള്ള ഗുബൈബും വൈക്കത്തുകാരന്‍ ജിത്തുവും മലപ്പുറത്തുകാരന്‍ ഇര്‍ഷാദും. കണ്ണടയ്ക്ക് ഒരു കോടി രൂപയാണ് വിലയിട്ടിരുന്നത്. കണ്ണടയുടെ പ്രവര്‍ത്തനം വിശദീകരിക്കുന്നതിന് നഗ്നരായ മോഡലുകളെ വച്ച് തയ്യാറാക്കിയ വീഡിയോയും നിര്‍മ്മിച്ചിരുന്നു. അഡ്വാന്‍സ് തുകവാങ്ങി മുങ്ങുന്നതാണ് രീതി. ആരും പരാതിപ്പെടില്ലല്ലോ.
പക്ഷെ പിടിവീണത് മറ്റൊരു കേസിലാണ്. പുരാവസ്തുക്കള്‍ നല്‍കാം എന്ന് പറഞ്ഞ് തമിഴ്നാട്ടിലെ തിരുവാണ്‍മിയൂര്‍കാരന്‍ നാഗരാജനില്‍ നിന്നും അഞ്ച് ലക്ഷം വാങ്ങിയ കേസില്‍ അയാള്‍ പരാതി നല്‍കി. കക്ഷികള്‍ വലയിലുമായി. മിന്നലേറ്റാല്‍ അത്ഭുതശക്തി ലഭിക്കുന്ന ഇറിഡിയം പാത്രവും ഇവരുടെ തട്ടിപ്പിന്‍റെ ഭാഗമായിരുന്നു.
ഇത്തരം തട്ടിപ്പുകള്‍ അനുസ്യൂതം തുടരും എന്നുറപ്പ്. നമ്മുടെ മോന്‍സണ്‍ മാവുങ്കലിന്‍റെ കൈയ്യില്‍ അകപ്പെട്ടിരുന്നത് രാഷ്ട്രീയക്കാരും ബിസിനസുകാരും മാത്രമായിരുന്നില്ലല്ലോ, പ്രസിദ്ധ ഗായകന്‍ എം.ജി.ശ്രീകുമാറും ചാനല്‍ നേതാക്കളും വരെയുണ്ടായിരുന്നു എന്നോര്‍ക്കുക 😆
No comments:
Post a Comment