ബഹുമാനപ്പെട്ട കേരള മുഖ്യമന്ത്രിക്ക് ഇടുക്കി ചിന്നക്കനാല്‍ താമസം അരിക്കൊമ്പന്‍ സമര്‍പ്പിക്കുന്ന നിവേദനം
ബഹുമാനപ്പെട്ട ഹൈക്കോടതി എന്നോട് കാട്ടുന്ന സ്നഹവും കാരണ്യവും താങ്കള്‍ അറിഞ്ഞിട്ടുണ്ടാവുമല്ലൊ. ഇപ്പോള്‍ കുറേ കാലമായി കാട്ടുജീവികളും നാട്ടുജീവികളായ മനുഷ്യരും തമ്മില്‍ നടക്കുന്ന ജീവിതമത്സരവും എല്ലാവര്‍ക്കും അറിയാവുന്നതാണല്ലൊ. സത്യത്തില്‍ കാടും നാടും എന്ന രീതി വിട്ട് എല്ലാവരും ഒന്നിച്ചു കഴിയുന്നതാണ് നല്ലത്. മനുഷ്യരുടെ മോശപ്പെട്ട സ്വഭാവങ്ങളൊക്കെ കുറച്ചു മാറി കിട്ടിയേനെ. അതിനുള്ള സാധ്യത വിദൂരമാണ് എന്നതിനാല്‍ വിഷയത്തിലേക്ക് കടക്കാം. കാട്ടില്‍ ഭക്ഷണമൊക്കെ തീരെ കുറഞ്ഞുതുടങ്ങി. ഹൈക്കോടതി പറഞ്ഞപോലെ,പുല്ലൊക്കെ നശിപ്പിച്ച് യൂക്കാലിപ്റ്റസ് നട്ടുപിടിക്കുന്നതരം തലതിരിഞ്ഞ പരിപാടികളാണല്ലൊ നിങ്ങള്‍ക്കുള്ളത്. ഞങ്ങള്‍ക്ക് ആഹാരമാകുന്ന ഈറ്റയൊക്കെ വെട്ടിനശിപ്പിച്ചു. അങ്ങിനെ ഇരിക്കെയാണ് ഒരു ദിവസം കുറച്ച് അരി കഴിക്കാന്‍ ഇടയായത്. സത്യം പറയാമല്ലൊ, നിങ്ങള്‍ മനുഷ്യര്‍ മദ്യം കഴിക്കുകയോ കഞ്ചാവ് പുകയ്ക്കുകയോ ചെയ്യുന്നപോലെ ഒരു അഡിക്ഷന്‍ എനിക്ക് വന്നുപോയിരിക്കുന്നു. അതുകൊണ്ടാണ് ഈ കാണുന്ന പ്രക്ഷോഭമൊക്കെ എന്ന് മനസിലായി . എന്നെ പിടിച്ച് പാലക്കാട്ടുള്ള പറമ്പിക്കുളത്ത് നടതള്ളാം എന്ന് കരുതുന്നത് ശരിയല്ല. അവിടെയും പച്ചരി തിന്ന് ജീവിക്കുകയെ നിവര്‍ത്തിയുള്ളു. നാറാണത്തുകാരന്‍ പറഞ്ഞപോലെ ഇടതുകാലിലെ മന്ത് വലതുകാലിലേക്ക് മാറ്റുന്നതിന് തുല്യമാകും ആ തീരുമാനം. അങ്ങിനെ ചെയ്യുന്നതിന് മയക്കുവെടി വയ്ക്കണം. അതെനിക്ക് തീരെ ഇഷ്ടമുള്ള കാര്യമല്ല. വരുംകാലം ആരോഗ്യപ്രശ്നങ്ങളും ഉണ്ടാക്കും. പിന്നെ ഈ കുങ്കികളും കൂടും വണ്ടിയും അനുസരിപ്പിക്കലും ഒക്കെയായി അനാവശ്യകാര്യങ്ങളിലേക്ക് സംഗതി നീക്കണ്ട. കാടിനുള്ളില്‍ വലിയ വാഹനവ്യൂഹമുണ്ടാക്കുന്നതൊന്നും എനിക്കിഷ്ടമല്ല. എന്‍റെ മൃഗ സുഹൃത്തുക്കളും അതിഷ്ടപ്പെടുന്നില്ല. ആയതിനാല്‍ താഴെ പറയുന്ന നിര്‍ദ്ദേശം നടപ്പിലാക്കണം എന്ന് ഞാന്‍ അഭ്യര്‍ത്ഥിക്കുന്നു. ചിന്നക്കനാല്‍ അരിക്കൊമ്പന്‍ എന്ന എന്നെ നാട്ടിലെ റേഷന്‍ ഡീലേഴ്സ് അസോസിയേഷനെ ഏല്‍പ്പിക്കുക. ഒരു ദിവസം ഒരു റേഷന്‍ കട എന്ന നിലയില്‍ നമുക്ക് അരി എത്തിച്ചുനല്‍കുക. അതല്ലെങ്കില്‍ അടിയന്‍ അവിടെ എത്തി ഏറ്റുവാങ്ങിക്കൊള്ളാം. ആ പ്രദേശത്ത് റേഷനരി സറണ്ടര്‍ ചെയ്യാനാഗ്രഹിക്കുന്ന റേഷന്‍ കാര്‍ഡുടമകള്‍ക്ക് അരിക്കൊമ്പനുവേണ്ടി എന്ന് പറഞ്ഞ് അരി സറണ്ടര്‍ ചെയ്യാന്‍ അനുവദിക്കുക. അരിക്ക് പകരം ഗോതമ്പോ ചെറുധാന്യമോ ആയാലും സ്വീകാര്യം. കോടതിയും ഇത് അംഗീകരിക്കും എന്നാണ് എന്‍റെ വിശ്വാസം. സമക്ഷത്തില്‍ നിന്നും ദയവുണ്ടായി ഈ അപേക്ഷ സ്വീകരിക്കുകയും അംഗീകരിക്കുകയും ചെയ്യണമെന്ന് താഴ്മയായി അപേക്ഷിക്കുന്നു. നന്ദിയോടെ , താങ്കളുടെ അരിക്കൊമ്പന്‍
No comments:
Post a Comment