ആണവ നിലയങ്ങള്‍ ഭീഷണിയോ ?
കൂടംകുളം ആണവനിലയത്തിനെതിരെ നടന്ന അതിദീര്‍ഘമായ സമരം വളരെ ശ്രദ്ധേയമായിരുന്നു. എന്നിട്ടും ആണവനിലയം വരുകയും തമിഴ്നാട്ടിലെ ഊര്‍ജ്ജപ്രതിസന്ധി അവസാനിക്കുകയും ചെയ്തു. 2008 ലെ ഇന്ത്യ-യുഎസ് സിവില്‍ ആണവക്കരാറില്‍ പ്രതിഷേധിച്ചാണ് ഇടതുപക്ഷം യുപിഎ സര്‍ക്കാരിനുള്ള പിന്തുണ പിന്‍വലിച്ചത്.പക്ഷെ സാധാരണക്കാരായ ജനങ്ങള്‍ക്ക് എന്താണ് ഈ വിഷയമൊന്നുപോലും മനസിലായതേയില്ല. അതുകൊണ്ടുതന്നെ അതിനെ തുടര്‍ന്ന് നടന്ന തെരഞ്ഞെടുപ്പില്‍ ആ വിഷയം ചര്‍ച്ച ആയതുമില്ല. കോണ്‍ഗ്രസ് നേതൃത്വം കൊടുത്ത യുപിഎ അധികാരത്തില്‍ തിരിച്ചെത്തുകയും ഇടതുപക്ഷത്തിന് വലിയ നഷ്ടമുണ്ടാവുകയും ചെയ്തു. ഇത്തരം വിഷയങ്ങള്‍ കാരണം ആണവനിലയങ്ങള്‍ സംബ്ബന്ധിച്ച വാര്‍ത്തകള്‍ ഞാന്‍ എപ്പോഴും ശ്രദ്ധിക്കുന്ന ഒന്നായി.
കൂടംകുളം ആയിരം മെഗാവാട്ട് വീതം ഊര്‍ജ്ജം ഉത്പ്പാദിപ്പിക്കുന്ന അതിന്‍റെ മൂന്ന് മുതല്‍ ആറ് വരെയുള്ള പ്ലാന്‍റുകളുടെ പണി ആരംഭിച്ചിരിക്കുന്ന ഘട്ടത്തിലാണ് ജര്‍മ്മനി അവരുടെ ആണവനിലയങ്ങള്‍ അടച്ചുപൂട്ടാന്‍ തീരുമാനിച്ചത്.ലോകം സൌരോര്‍ജ്ജത്തിലേക്കും കാറ്റില്‍ നിന്നുള്ള വൈദ്യുതിയിലേക്കും കടക്കുമ്പോള്‍ അപകടകരവും വിലയേറിയതുമായ ആണവോര്‍ജ്ജം ആവശ്യമോ എന്ന ചോദ്യം ന്യായമാണ് താനും. ഈ ചോദ്യത്തിന് ശരിയായ ഉത്തരമാണ് ബംഗളൂരു ദേശീയ ഇന്‍സ്റ്റിട്യൂട്ട് ഓഫ് അഡ്വാന്‍സ്ഡ് സ്റ്റഡീസിലെ ആര്‍.ശ്രീകാന്തും ന്യൂഡല്‍ഹി സെന്‍റര്‍ ഫോര്‍ സോഷ്യല്‍ ഇക്കണോമിക് പ്രോഗ്രസിലെ രാഹുല്‍ തൊഗാഡിയയുമായി ഹിന്ദുവിലെ ജേക്കബ് കോശി നടത്തിയ സംഭാഷണം.
ജര്‍മ്മനി ആണവഊര്‍ജ്ജത്തില്‍ നിന്നും പിന്‍വാങ്ങിയെങ്കിലും ഉക്രയിന്‍ യുദ്ധം തുടങ്ങിയ ശേഷമുള്ള ഊര്‍ജ്ജപ്രതിസന്ധി പരിഹരിക്കാന്‍ അമേരിക്കയും യൂറോപ്പിലെ മിക്ക രാജ്യങ്ങളും ആണവനിലയങ്ങളുടെ എണ്ണം കൂട്ടുകയാണ്. ദക്ഷിണകൊറിയ 2030 ഓടെ മൊത്തം ഊര്‍ജ്ജത്തിന്‍റെ മുപ്പത് ശതമാനം ആണവോര്‍ജ്ജമാക്കാന്‍ പദ്ധതിയിടുകയാണ്. ഫുക്കുഷിമ അപകടത്തില്‍ 15000 പേര്‍ മരിച്ചതിനെ തുടര്‍ന്ന് അടച്ചിട്ട ജപ്പാനിലെ പത്ത് ആണവനിലയങ്ങളും തുറന്ന് പ്രവര്‍ത്തനം ആരംഭിച്ചു കഴിഞ്ഞു. പുതുതായി പത്തെണ്ണം ആരംഭിക്കുകയാണ്. അവര്‍ക്ക് ഇതല്ലെങ്കില്‍ പിന്നെ ഇറക്കുമതി ചെയ്യുന്ന കല്‍ക്കരിയേയോ സിഎന്‍ജിയേയോ ആശ്രയിക്കേണ്ടിവരും. കല്‍ക്കരിയേക്കാളും സിഎന്‍ജിയേക്കാളും കുറഞ്ഞ കാര്‍ബണ്‍ എമിഷനേ ഇതുവഴി ഉണ്ടാകൂ എന്നതാണ് ജപ്പാന്‍റെ മനം മാറ്റത്തിന് കാരണം. മാത്രമല്ല കാറ്റിനേയും സൌരോര്‍ജ്ജത്തെയും എപ്പോഴും ആശ്രയിക്കാനും കഴിയില്ല എന്ന തിരിച്ചറിവും ഇതിനൊരു കാരണമാണ്.
കൂടംകുളത്ത് തന്നെ ആയിരം മെഗാവാട്ട് ഉത്പ്പാദിപ്പിക്കാന്‍ 25 ടണ്‍ ലോ എന്‍ റിച്ച്ഡ് യുറേനിയം മതിയാകും, എന്നാല്‍ കല്‍ക്കരി വഴി ഇത്രയും ഉത്പ്പാദനം നടത്താന്‍ അഞ്ച് ദശലക്ഷം ടണ്‍ കല്‍ക്കരി വേണ്ടിവരും. അതുവഴി ഉണ്ടാകുന്ന ചാരം പ്രകൃതിക്ക് വരുത്തുന്ന നാശം ഭീകരവുമാണ്. ഇന്ത്യക്ക് ഇനിയും ജലവൈദ്യുത പദ്ധതികള്‍ കൂട്ടാന്‍ കഴിയില്ലെന്നും പരിസ്ഥിതി അതിന് അനുഗുണമല്ലെന്നും അവര്‍ പറയുന്നു. അതുകൊണ്ടുതന്നെ കല്‍ക്കരിക്ക് ബദല്‍ ആണവോര്‍ജ്ജം തന്നെ എന്നവര്‍ അടിവരയിടുന്നു. ഇപ്പോള്‍ കല്‍ക്കരിയിലൂടെ ലഭിക്കുന്ന 210 ജിഗാവാട്ടസ് നമ്മുടെ മൊത്തം വൈദ്യുതിയുടെ എഴുപത്തി മൂന്ന് ശതമാനമാണ്. ഇന്ത്യ ഉത്പ്പാദിപ്പിക്കുന്ന ആണവോര്‍ജ്ജം വെറും 3.2 ശതമാനം മാത്രമാണ്. ഇത് വര്‍ദ്ധിപ്പിക്കാന്‍ ആണവോര്‍ജ്ജ കോര്‍പ്പറേഷന്‍ ഓഫ് ഇന്ത്യ മാത്രം വിചാരിച്ചാല്‍ നടക്കില്ല എന്നും ഇവര്‍ അഭിപ്രായപ്പെടുന്നു. എന്‍ടിപിസിക്കും കൂടി ആണവനിലയം സ്ഥാപിക്കാന്‍ അനുമതി നല്‍കണം എന്നാണ് അവര്‍ പറയുന്നത്. 2070 ല്‍ കാര്‍ബണ്‍ എമിഷന്‍ നെറ്റ്സീറോ ആകണമെങ്കില്‍ ആണവോര്‍ജ്ജം 2050 ഓടെ 100 ജിഗാവാട്ട്സ് ആക്കേണ്ടതുണ്ടെന്നും അവര്‍ പറയുന്നു. ഇതിനായി ചെറിയ റിയാക്ടറുകളും വലിയ റിയാക്ടറുകളും സ്ഥാപിക്കണമെന്നും അവര്‍ അഭിപ്രായപ്പെടുന്നു
No comments:
Post a Comment