ഗ്രേറ്റ് ഫാദര്‍
വളരെ ഗൌരവമേറിയ ഒരു പ്രമേയം സൂപ്പര്‍ സ്റ്റാറിന് വേണ്ടി
മനഃപൂര്‍വ്വം സൃഷ്ടിച്ച ചില രംഗങ്ങളിലൂടെയും സ്ലോ മോഷനിലൂടെയും ബാക്ക്ഗ്രൌണ്ട്
മ്യൂസിക്കിലൂടെയും ഗൌരവം ചോര്‍ത്തി
അവതരിപ്പിച്ചു എന്നതാണ് ഈ ചിത്രത്തില്‍ ഹനീഫ് അദേനി ചെയ്ത പാപം. പുതിയ നിയമവും മുന്നറിയിപ്പും പോലെ
തീവ്രതയോടെ ചിത്രം കാണാന്‍ കഴിഞ്ഞില്ല. ഏകദേശം അവസാന ഭാഗം വരെ വില്ലനെ
ഒളിപ്പിക്കാന്‍ കാണിച്ച കൌശലം എടുത്തു പറയാവുന്നതാണ്. സസ്പെന്‍സ് നിലനിര്‍ത്താന്‍
ആദ്യഭാഗത്ത് നല്ല ശ്രമം നടത്തിയിട്ടുണ്ട്. ചില ഷോട്ടുകള്‍ പ്രത്യേകം എടുത്തു
പറയേണ്ടവയാണ്. ഒരു കുട്ടിയെ കൊന്നിട്ടിരിക്കുന്ന ഇടത്തേക്ക് ആളുകള്‍ എത്തുന്നതിന്‍റെ
മുകളില്‍ നിന്നുള്ള ഷോട്ട് ഇതിലൊന്നാണ്.
മമ്മൂട്ടിയെ സൂപ്പര്‍ ഹീറോയാക്കി
അവതരിപ്പിക്കാന്‍ തയ്യാറാക്കിയ സന്ദര്‍ഭങ്ങള്‍ ദുര്‍ബ്ബലമായിപ്പോയി. ചെറിയ
റോളാണെങ്കിലും വില്ലനായി വേഷമിട്ട സന്തോഷ് കീഴാറ്റൂരാണ് ശ്രദ്ധേയന്‍. ബേബി അനിഘ
ഉള്‍പ്പെടെയുള്ള കുട്ടികളും നല്ല നിലവാരം പുലര്‍ത്തി. മമ്മൂട്ടി ഫാന്‍സിന്
ആവശ്യമുള്ളതൊക്കെ സിനിമ നല്‍കുന്നുണ്ട്. അതിഭാവുകത്വങ്ങളെ വിമര്‍ശിക്കാനുള്ള
മനസ്സ് മാറ്റി വച്ച് സിനിമ കാണാനിരുന്നാല്‍
മുഷിപ്പില്ലാതെ കാണാവുന്ന ചിത്രമാണ്
ഗ്രേറ്റ് ഫാദര്‍. അതിലെ സന്ദേശം ചിന്തോദ്ദീപകം തന്നെ എന്ന് ഉറപ്പായും
പറയാം."പൊക്കിളിനും മുട്ടിനുമിടിയല്‍ സ്ത്രീക്ക് എന്തോ നഷ്ടപ്പെടാനുണ്ട് എന്ന സമൂഹത്തിന്‍റെ തോന്നലിനാണ് അവസാനമാകേണ്ടത് " എന്ന നിലയില്‍ സൈക്കോളജിസ്റ്റിന്‍റ ഒരു ഡയലോഗുണ്ട് ഇതില്‍. അത് ഏറ്റവും ശ്രദ്ധേയമാണ്.
No comments:
Post a Comment